PUISI GAYO

L.K.Ara

SARIK

ike denem aku kin ningko
kunantin ulen reduk
kedang iyone salakmu petungkuk

ike denem aku kin ningko
kujamah pucuk ni kerpe lemi
kedang iyone sebukumu temuni

ike denem aku kin ningko
ku entong gelep ni lo
kedang sisumu i parinko iyone

ike mukale aku kin ningko
betajir aku wan uren
kedang iyone munetep eluhmu

ike mukale aku kin ningko
musangka aku kuwan bade
kudemu iyone
kerasni sarikmu

Takengon, l97l
-------------

L.K.Ara

GERELMU

i tetayang kuyu
kutatangan pumu
duh, ringen ni tubuh
aku mulelayang
bersenggayun
iwan ulen ku ukir gerelmu

urum kuyu
urum emun
rembegengku turun
pucuk ni kerpe bengi
nami bengi
ari bumi kupepanang gerelmu

Takengon, l972
-------------

L.K.Ara

TIPIS MUGARIS

tipis mugaris
ilang murentang
wan senye

gip mugaris
mugerak mulimak
wan atengku

nasibmu
suderengku

jejarimu kering
matamu layu
atemu kecut
kutatangan salak
makin mulimak
terbayang nasibmu
suderengku
ama inengku

Takengon, l972
----------

L.K.Ara

IKE

ike ko kekanak
aku pe kucak
berperau reroante
sana si rasako

ike ko beru
aku bujang
bedenang perau atan gelumang
kune perasanmu

ike ko nge kin ine
aku nge kin ama

ku kayuh perau kin ningko
sana perasanmu

sara ketika
ike kite nge tue
olok tue
kuyu munemah emah peraunte
kusi perasanmu

Takengon, l972